de shit isch duss! de schumi gseht de silberstreife am horizont und öb ichs will wahr ha oder nöd, ich gseh rot vor wuet! ferraristi uf de ganze wält werdet das nöd eifach so schlucke, de schumi wächslet zum erzrival mit em stern, ich glaubs eifach nöd! das er zruggchunnt isch super für d’formel 1, ke diskussion, und die „junge wilde“ händ etz wieder en härte, 41-jährige brocke uf de pischte vo sicher wider ganz vorne mitfahre wird. es isch mit spannig z’rächne, wie sich vettel, hamilton aber au die beide latinos im ferrari gäge de altmeischter schlönd. bizarr, i de letschte beide jahr wo de schumi no gfahre isch, het ihm de alonso beidi titel abgrunge, etz sitzt de alonso im ferrari und mues mit sim einstige gägnerteam wieder gäge d’schumi-brawn allianz akämpfe. de schumi wird sicher vorne mitfahre (achtung widerholig), aber ich dänke, in maranello heissts „und etz ersch recht!“, kei ahnig wie me das uf italienisch seit. es wird für de massa und de fönsi e bsunderi sach sii, gäg de 7-malig-wm azträtte, das wird e ganz e heissi sach nächscht jahr, esischeso!
quo vadis, schumi?
Dezember 23rd, 2009bluetigi duume
Dezember 22nd, 2009es isch wieder mal zit für es (für mich) neus restaurant. hüt simmer, uf en vorschlag vomene arbetskolleg im bluetige duume im zürcher niederdorf sii. d’erwartige sind nöd bescheide gsi, aber s’ässe scho. nei, es git ken grund de lade schlecht z’mache, prislich und vo de qualität her stimmts allimal, e eifachi beiz mit emene überschaubare bieragebot und währschafter huusmannschoscht. für en glägeheitsraucher wie ich eine bin isch positiv z’erwähne, dass es ersch erlaubt isch z’rauche wenn di meischte lüüt scho gässe händ, big ups! doch die vorschusslorbeere vo mim arbetskolleg händ d’erwartige scho es bitz stiige lah, und die sind nöd ganz erfüllt worde. de nüsslisalat mit ei isch passabel gsi, s’empfolene zürigschnätzletzs mit rösti isch definitiv nüüt speziells gsi. faad und langwilig, sorry aber ——-> esischeso!
blogge, batman und billigi usrede…
Dezember 21st, 2009ja, lang ischs her sit ich s’letscht mal bloggt han, sinnkrise oder so ähnlich, vilicht au nur zviel im chopf, tuusig ideä, mal det en funke mal da en gedankeblitz und so bliibt me immer a öppisem dra und macht vo allem e bitz, wow das reimt sich sogar! wenn ich mini wp-kategorie so aluege, dann hani vo all dem i dr zwüscheziit alles gmacht, guet, s’blogge isch scho chli z’churz cho, ich werd mi bessere. ich füere hüt d’kategorie ‚comics‘ i, eifach usem grund, will i da derzue halt au öppis z’säge han. ich bin bi mine comics, nachdem ich bi de x-men und spiderman serie en 2 jahres, und bi wolverine en 5(!) jahres rückstand ufgholt han endlich bim mitternachtsdetektiv batman acho. de al (achtung! insiderwüsse gfraget), wird sich i de höll en tee choche wenn er das etz list, aber batman isch huere geil! ich frag mich zwar hin und wieder öbs äch stimmt, dass die zwei schwul sind, denn die gönd ab wienes zäpfli, esischeso!
en wartsaal wo au ässe serviert wird
November 7th, 2009im napoli erwartet dich es eimaligs interiör, uf de spiischarte gits köstlichkeite a l’italiana. de gerardo isch durchus en engagierte gastgeber aber was de service da so leischtet entspricht nöd dem was me vomene top restaurant erwartet. bstellt hani en minestrone di verdure fresche un becho hani e tomatesuppe, di isch au sehr fein gsi, aber die hani eifach nöd bschtellt gha. de wolfsbarsch hets nur ab 2 persone geh, obwohl vo dem nüt i de charte gstande isch, d’vongole sind genau so wenig verfüegbar gsi, wie de wii wo mer für üses ässe usgläse händ. ufs ässe hämmer e gschlageni stund chänne warte und wos denn cho isch, mues me säge „ok“, nöd schlächt, aber au nöd überwältigend. uf d’rächnig wartisch denn au mal gärn nomal e halb stund und meh, usser du machsch dich bim scheff bemerkbar. s’gägeteil vo guet gmacht isch nun mal „guet gmeint“, obwohl me zur begrüessig feini bruschette und en champagner offeriert überchunnt und zur versöhnig nach ere desolate serviceleischtig en spezielle schnapps serviert, da gerardo herrschet zueständ wie in neapel, esischeso!
au es bier chan im holzfass glageret werde
Oktober 17th, 2009dass s’appenzeller bier eis vo de beschte isch, isch wiit ume bekannt. etz hani mal es holzfassbier probiert und mues säge, das züg isch huere guet! eimal meh bestätigts, dass es sich lohnt neui sache uszprobiere. das bier isch rund und voll im gschmack, dur d’lagerig im holzfass chunts e ganz e spezielli würzigi note über. und wieder es appenzeller bier wo wiit obe uf minere beschteliste isch, esischeso!
josef a de gasometerstrass
Oktober 13th, 2009im chreis cheib hets di eint oder anderi kulinarischi perle versteckt. im josef gits ke hauptgang und du chasch, wennd wotsch, dini mahlziit mit emene stuck chueche und kafi afo. me bschtellt 2,3 oder 4 teller und stellt sich die nach wunsch zäme, d’portione sind agmässe, d’empfelig „drü täller für de normali hunger“ isch nöd schlecht. s’volk isch trendy-vo-allem-e-chli, spezielli bilder und collage a de wänd schaffed e trendy atmosphäre und s’iigspilte team isch fründlich und effizient. das wo uf de tisch chunnt isch guet zuebereitet und nöd alltäglich. ich han mir eifachheitshalber eifach es menu (5 Teller) gönnt, so hani nöd müesse uswähle. de schwinsbrate uf de tomatepolenta isch köstlich gsi. prislich ischs ok, en abig mit 4 persone inkl. e fläsche wii und kafi rechnisch 350 hämmer, und nachem ässe chame sichs a de bar gmüetlich mache und en ramazzoti, äh en appenzeller chrüter bstellä, esischeso!
gussflusstanz
Oktober 9th, 2009ja was heisst etz das scho wieder? ich han halt spass a nöd alltägliche wortkreatzione und ich schere mi en dräck öb me kreatzione würklich eso schriibt 😉 schliessli isch es ja nur min blog, oder? also a derä stell hani 2, genau zwei sache z’brichte. erschtens: „die giesserei“ in örlike mues me gseh ha, es ghobenigs restaurant mit professionellem, überus fründlichem service und emene kulinarische agebot wo wortwörtlich us eim guss chunnt, hochstehendi gricht imene eimalige ambiente, es lohnt sich. aschlüssend simmer id halle go riverdance luege, bis uf die bekloppti dame diräkt hinder üs (mir händ i dr halle immer wahnsinnig glück mit eusne unmittelbare nachbere), wo immer wieder im takt probiert het mit z’klatsche und z’singe mues me säge, die giele händ also scho no zimmli flinggi bei, heieiei! au das lohnt sich allimal, wemme sich wiedermal wet echli als kulturfuzzi usgeh und unbedingt öppis brucht zum de anderä z’verzellä. das tönt etz vilicht echli nöd so guet aber so sölls nöd sii, es isch echt e tolli show es lohnt sich aber, wemme plätz i de vordere reihe buecht, mir sind halt echli wiit hinde gsi, und so händ mini äugli nümm würggli viel gseh. was chunnt etz ächt? klar! esischeso!
ja vas cripts…
Oktober 6th, 2009…ich bin im moment es openbook vo galileo am läse, thema javascript. i programmiere so echli für mich mit php und mysql aber irgendwänn sind d’möglichkeite demit usgschöpft. vorallem wennd echli benutzerfründlichi funktione möchtisch erstelle chunnsch eifach nöd um öppis à la javascript ume. wordpress oder au typolight sind werchzüg wo dur ajax sehr sexy derher chömed und us dem grund hani mi entschide de erschti schritt in agriff z’neh und javascript azluege. was i bisher gseh han isch nüt meh als e wiiteri programmiersprach, vieles isch scho bekannt, jedes programmierbuech liest sich halt doch in etwa gliich. bin aber gspannt druff wenn i mini erschti ajax funktion wird baue, und dänn funklets und glitzereds in mine äugli, esischeso!
mis neue macbook pro isch iitroffe
Oktober 5th, 2009i het nie dänkt das i das je mal wird inen blog ine schriibe. hüt hani mis neue mac teil becho, die ziele won i etz da schriibe sind die erschte par zeiche woni i das teil igib. das ding isch recht edel verarbeitet und no jungfräulich rein. eigetli hanis kauft, damit i mal cubase druff tue chan um echli sälber am sound ume z’tüftle. aber wahrschindli wirds nöd nur bi dem bliibe, min pc isch langsam alt und ächzt im züüg ummenand, wahrschinli macht ers nümm lang, denn hani wenigstens es teil wo ni no druf chan schaffe und ersch recht no guet uusgseht, esischeso!
detroit vs. dnb
Oktober 4th, 2009han vome kolleg e rechti sammlig a detroit scherbene usglehnt becho. voller freud hani mi as werch gmacht, han aber schnäll festgstellt, dass es e rechti umstellig isch. bim drum and bass hesch viel klareri liedstrukture, de ufbau vom lied und die einzelne „kapitel“ sind klarer. detroit het sehr langi liedstrukture wo sich minim änderet, da chame sehr guet zwei oder mehreri plattene langi ziit synchron laufe la. bim dnb hets viel meh breakdowns und dramaturgischi uf- und abbauelement zudem sind praktisch alli dnb maxi singles mit 45rpm presst und händ pro siite eis lied. so sind uf de platte sälber klari liedstrukture ersichtlich, wil de groove nöd so eng prässt isch. bim detroit sind sehr viel plattene mit drü bis vier lieder presst, dur das sind d’liedstrukture uf de platte nöd so guet sichtbar. uf alli fäll macht mer s’mische mit dnb dütlich meh spass, esischeso!