esischeso.ch

am sunntig isch es sältenes rots ränntier ufeme formel 1 podescht xichtet worde. e gwüssi ähnlichkeit zum bereits vor es paar wuche erwähnte vetteltier isch erkennbar. mamma mia, che corsa! de grossi schwiiger het sich mit em mässer zwüsched de zähnd füre kämpft, e strategiepoker wo ufgange isch. am schluss hets leider nöd ganz glanged um de silbergockel mit goldchetteli abzfange, es paar rundine meh und de hamilton hetti siis rote wunder erläbt. es weht en neue wind in maranello und was mir bsunders guet gfallt isch de neui capo vo dr scuderia. de maurizio wo guet achunnt (er heisst ja nöd umsuscht „Arrivabene“) isch scho wie nes zäpfli abgange in china und etz in bahrain grad nomal. wo de bleichi schwiiger (räikönnen) i dr erschte rundi zeiged het was i ihm steckt, het de maurizio d’fuscht ballt vor stolz uf de kimi, und zwar ufene art, wo me suscht i dr sterile formel 1 nöd oft xeht. forza ferrari, mached wiiter so, so chunnts guet, esischeso!

any given sunday, gopferteli, diä mercedes sind aber tami-schnäll xii das weekend. s’rote vetteltier isch zwar wieder xichtet worde ufem podescht, leider wieder echli verschobe vom platz mit dr beschte ussicht. i de mitti het sich de gockel hamilton iignischtet, ich weiss nöd was de plötzli bisse hät. jetz lauft er mit so mega-macho-räpper-goldchettäli durs paddock, ich mein, wers het, der dörfs natürli zeige, nüüt dergäge. aber grad de hamilton, wo immer wieder mues betone was für en arme bueb er mal xii isch, oooooh, und jetz vergisst er woner her chunnt und protzed à la public enemy dur d’boxegass. facepalm und fail uf de ganze linie, bringed dem manndli e couch das er mal chan hereligge, ich glaub er bruucht dringed öpper zum rede.

also, es isch eso, wenn ferrari gwünnt, dänn hänggi mini schöni ferrari fahne vors huus. d’farb vo minere frau passt sich dänn (vor luuter främdschäme) der farb vo der fahne a, chani verstah. es hüüfed sich mäldige über es rots overall uf em podest nacheme formel 1 ränne. z’letscht sig das overall sogar wortwörtlich over-all, also über allne andere, gsichtet worde, und das isch guet eso. de sebastiano het rächt pipi i dä äugli gha, es bedüütet ihm wohl rächt viel i dem rote gaul z’oberscht z’stah. kes problem, nur wiiter so, d’uussicht vo det obe isch wohl nöd schlächt und me bhaltet de überblick über die andere, chani verstah. ich frag mich wie’s ächt em fönsi so gaht, irgendwie tuet er mir echli leid. i dem wiisse mclaren-dress xeht er echli bleich us, und wenn’s ihm vorher bi de rote gstunke het nöd vorne chönne mit z’fahre, denn gfallts ihm etz sicher meeeega bi mclaren… nach all dem was er für ferrari gleischtet het, hetti er sich us hüttiger sicht en gfalle gmacht und wäri für es bitzeli geduld wohl nöd schlächt belohnt worde. aber er isch nöd nume en heruusragende pilot sondern au e luunischi diva und het ke luscht me gha, de störrischi gaul z’riite. etz chunnt da siin dauerrivale us de letschte jahr, macht eine uf grande famiglia bi dr scuderia und de fönsi luegt id röhre, fallt uus und mues zueluege wie de vettel am rote gaul d’spore git und zum allererschte mal sit de iifüehrig vom neue reglemänt mercedes uf de strecki bezwingt. letscht jahr het de ricciardo in de blechdose (aka red-bull) mercedes 3x gschlage, aber jedesmal isch es mit technische problem (kanada), kollisione (belgie) oder wätterkapriole (ungarn) z’stand cho, nie us eigeter chraft. also wer wieder es rots overall sichtet, söll sich mälde, d’fahne isch jetzt wieder abgstaubed und wartet uf wiiteri iisaätz, forza ferrari, forza! esischeso!

hüt morge am 6i hani mi wieder als lärche gfühlt und mit chliine äugli bini vor de fernseh gschliche. formel 1 in melbourne, zum glück isch s’erschte ränne jewiils am morge früeh, denn mues i nöd allzu lang warte bis es losgaht 🙂 am liebschte hani darum d’ränne wo im ferne oschte stattfindet, denn isch de sunntig nöd sooo lang…im vorfeld hets bi sauber leider zimmli viel jurischtefueter geh, de isch de verantwortliche (allem vora de monisha kaltenborn) sichtlich ufem mägli glääge. de giedo van der garde het sich am grüene tisch siis rennfahrercockpit erstritte und het tatsächlich welle fahre, zum glück het er grössi zeiget und freiwillig uf siin grichtlich zuegsicherete startplatz verzichtet. uf 20 minute und süschtige websiitene händ sich d’prolos ke blössi geh und händ unisono de rücktritt vo de teamcheffin kaltenborn gforderet. unfähig sig si, und hebi s’läbeswärch vom peter sauber innert chürzi zerstört. jetzt nähmtis mich mal wunder, was die spackos nach em erfolgriiche ränne zum beschte gäbet. sauber isch im moment 3. i de klassifikation und de nasr het bi siim debut en suubere 5. platz iigfahre. notabene voremene gwüsse daniel ricciardo inere silberdose namens redbull. klar, letscht jahr isch de ferrari motor im heck vom sauber en bessere staubsuuger xii, nöd nur wil er so tönt, sondern au wil de motor so zimmli scheisse xii isch. das jahr schiinets in maranello em lahme gaul endlich wieder d’spore z’geh und da defo profitiert au de sauber. ich bin mir sicher, dass die besserwüsser spötischtens jetzt müend realisiert ha, dass d’frau kaltenborn nöd so viel chan falsch gmacht ha, denn so en guete start vo sauber hets nonig oft geh. ganz näbedbii möchti no erwähne, dass en maa im rote overall ufem podescht xichtet worde isch, ich hoffe er het sich nöd verirrt und das er de wäg no öfters wird finde. de vettel isch bi siim erschte ränne für d’scuderia ufs podescht gfahre und het nach de ziildurchfahrt gmeint: „ragazzi, forza ferrari!“, die wichtigschti lektion het er scho glernt, jetz mues er nur no en chliine schritt mache, und dänn hänggi mini fahne wieder mal use, esischeso!

Mine Bekannte isch es scho lang klar, wenn Formel 1 isch, dänn mues me immer ums Qualifying und ums Ränne umme plane wenn me mit mir möcht abmache. Klar mit de Jahre bini echli vernünftiger worde, aber meischtens bin ich der einzig wo das seit. Ich informiere mich sit langem uf motorsport-total.de und öppis fallt mer sit dere Saison bsunders uuf: chuum sitzt en Tüütsche im rote Auto denn verschwindet wie us zauberhand plötzlich die bissige Kommentär vo de Redaktore. Luschtig, nöd? Wo de Fönsi und de Kimi im Dienscht vom Cavallo Rampante xii sind, isch jede Aspruch vo de Scuderia uf de WM-Titel süffisant belächlet worde. Klar, i de letschte Jahr isch „Grande Casino“ in Maranello xii, de Fönsi het langsam (und sicher zu recht) d’Geduld verlore und de Iiswürfel Kimi isch nöd vom Fläck cho. Das sind sicherlich au Gründ um sich über Ferrari luschtig zmache, aber für en Journi au es Armuetszügnis. Mir isches sit Jahre egal wer de Gaul riitet, Hauptsach er gwünnt: Forza Ferrari! Forza Vettel! Esischeso, gopferdeckel 🙂

ja liebi lüüt, 7 mönet isch es her, esischeso, aber erwartet etz ke entschuldigung das es so lang duured het bis ich mich wieder zu wort mälde, es het alles sini gründ und die gönd nur mich öppis a 😉 d’formel 1 saison isch das jahr scho im septämber, 6 ränne vor schluss praktisch entschide, das hets sit de schumi-ära nümm geh. doch ohni am schumi sini glanztate wellä dur de dräck zieh, relativiert sich für mich viles sit i de film „senna“ xeh ha. han scho öppe gläse das er es usnahmetalänt xi seg, aber was i dem film zeiget wird gaht förmlich under d’hut. obwohl ich alles anderi als nöch bim wasser baut bin, shit, die gschicht isch mer verdammt nöch gange. was er uf de pischte vollzoge het isch fascht übermännschlich xi, aber no vielmeh zieht mi siini persönlichkeit in bann. ich cha das nöd i wort fasse, da müend anderi wortartischte herä. di hüttigi formel 1 isch so öppis vo playmobil, wäni chännt würi nümm luege, aber ich chan nöd. wo de ratzenberger am 30.4.94 sin tödliche unfall in imola gha het, het de f1-chefarzt zum senna xeit: „was machemer da eigetli, chum mir lönd alles la liggä und gönd go fische“ de senna het ebä gärn gfisched, aber er het druf gantwortet: „ich cha nöd höre“, am tag druf isch er tödlich verunfallt. das cha mir vor em fernseh schwer passiere und sit dem tag isch bis hüt nie meh en fahrer i de formel 1 gstorbe. es mues ebä immer zersch öppis passiere, bevor öppis undernoh wird. jedes opfer isch eis zvil, im fall vom senna aber es bsunders höchs opfer, esischleidereso… ;-(

…formel 1 wältmeischter 2010. und irgendwie werd ich s’gfühl nöd los, dass die rote sich eifach verspekuliert händ. de boxestopp vom alonso isch nur duregfüehrt worde will me uf de webber glueget het, und debi het me die russischi rakete petrov überseh, und schwupp, isch de titel weg. e absolut geili f1-saison isch verbii und am schluss gwünnt eine wos definitiv au verdient het. und e chline wermuetstropfe gits für mich, die leidigi diskussion um stallorder in hockeheim isch so vom tisch und gwunne het es absolut sportlichs team, punkt! esischeso, das mues au mal gseit werde…

für eimal ischs ränne in singapur vomene rote sieg krönt worde. ich liide immerno under em trauma vo 2008, wo de massa i füerig liegend bim tankstopp de tankschluch mitgrisse het. es paar rundine später het de kimi s’auto bim singapur sling id wand gschtellt. letschts jahr hani s’ränne ganz verpasst, was nöd ganz so, aber immerno traumatisch xi isch. und etz das, de fönsi git alles und gwünnt es langs und härts ränne. dasmal kes trauma sondern en traum in rot, esischeso!

es het nöd sölle guet cho, hüt in spa. vo 5 fahrer wo innerhalb vo 20 pünkt um de titel fahred, sind in spa 3 punktelos blibe und di andere 2 holed z maximum, platz 1 und 2 use. de hamilton übernimmt wieder d füehrig i de wm, de alonso het nümm 20 sondern 41 pünkt rückstand, es isch also scho besser gstande für die rote. esischeso!

…aber er het doch sälber gseit, dass er im fall der fälle für de fönsi fahrt. de sport isch geschter sicherlich uf de strecki blibe, im wahrsten sinne des wortes. vili meinet de massa sig dur die aktion definitiv zur nummer 2 degradiert worde, das glaub ich hingäge nöd. d’situation i de fahrer wm isch klar, de massa wird de rückstand chum ufhole. zudem het de fönsi (leider) bisher di besseri falle gmacht. ich bin en massa fan, für die wos nonig gmerkt händ. wieso das sie aber geschter sones theater abzoge händ chani mir nöd erkläre. aber irgend e absicht steckt dehinder. klar uf der einte siite d’situation i de fahrer wm, aber das hettis nöd nötig gmacht de platzwächsel so offesichtlich vor de versammelte wältöffentlichkeit z kommuniziere. was steckt also dehinder? ich chönnti mir no vorstellä, dass hinder derä provokation s teamorder verbot varballhornt söll werdä. es isch ja au e scheiss reglä. und d’situation isch nur beschränkt mit 2002, dem jahr mit em „rubens, let michael pass for the championship“-skandal. es isch s 6-te ränne im kalender gsi, de schumi het 4 vo 5 ränne gwunne gha und mit über 20 pünkt vorsprung d’wältmeischterschaft agfüert. es isch also grad emal en drittel vo de wältmeischterschaft verbi gsi und de schumi hetti dur de 2. platz ken grosse schade erlitte. aber etz simmer über d’saisonmitti, ferrari het i de letschte 2 ränne vor hockeheim grad mal 4 vo 86 mögliche pünkt gholt. also d’situation isch ernscht, und das legitimiert us minere sich die (leider) unsportlichi entscheidig, aber wieso die das so offesichtlich mached und dänn so tüend als ob nüt xi wär? kei ahnig, piinlich, aber esischeso!