esischeso.ch

genau so gross isch de rückstand vom alonso uf de vettel bim qualifying in hockeheim gsi. d’strecki in hockeheim isch 4,574 km lang, de vettel isch um 0.006 km/h schneller xi. das heisst inere stund het de vettel 6 meter vorsprung uf de alonso wenn beide konstant mit dere gschwindigkeit fahred. nach einere rundi sind das öppe 12.5 cm abstand, läck johnny isch das knapp xi, esischeso!

…isch hüt es renne zum vergässe xi! zallererscht freuts mi, das es am webber nach sim spektkuläre unfall guet gaht. mir isch s’herz im hals stecke blibe, won i ihn han xeh abflüüge. was nachher cho isch, isch eifach lächerlich! de hamilton, uf platz 2 liegend, überholt regelwidrig, grad unmittelbar nach de boxeuusfahrt s’safetycar, de alonso, wo sich ein meter hinder ihm befindet stellt sich hinder s’safetycar. währed dem d’ferraris ei rundi bi 10 km/h am safetycar folget günd alli hindedra ad box um reife z’wächsle. am schluss vo de rundi dörfed d’ferraris s’safetycar überhole, aber i dere ziit händ de vettel (platz 1) und de hamilton (platz 2) und alli hinder ihne scho d’reife gwächslet. die vorne sind wägzoge, und die wo vorher hinder de farraris xi sind, händ i dere ziit, wo d’ferraris langsam hinderem safetycar hergfahre sind, ufgholt. nachem reifewächsel sind de alonso uf 10 und de massa uf 17 oder so xi. suberi leischtig vo de rännleitig! de vettel und de hamilton händ en vorteil us de situation zoge, am alonso und am massa isch es zum verhängnis worde, dass si sich ad reglä ghalte händ. de hamilton het zwar e drive trhough penalty übercho, aber da er soviel vorsprung uf de 3. gha het, het er nöd mal en platz verlore. d’rännleitig hetti no d’möglichkeit gha, nachem ränne e straf uuszspräche, wil die autos, wo sich hinder de ferraris befunde händ, under gälber flagge z’schnäll xi sind. aber die straf vo 5 sekunde isch zum totlache und het praktisch ken iifluss ufs rännergäbnis, wenn me berücksichtigt was de fählentscheid am afang für folge ufs rännergäbnis gha het. es isch eifach zum devolaufe so öppis, esischeso, taminomal!

…ferrari hets gliich immer nonig glernt. das gits ja gar nöd, in malaysia schiffets nun mal sehr oft und bi räge wird e f1-strecki nöd schnäller, gopferteli nomal. etz warted millioneschwäri top-fahrer berate dur top ingenieure 10 minute i de box währeddem d’underdogs feucht-fröhlich ihri rundine drähed. und wo sich die rote ändlich entscheided uf strecki z’gah wärs besser es gummiboot anstatt es f1-auto underem arsch z’ha. und so started morn die beide rote vo 19 und 21, suuuupper, mann, gits gar nöd, scheisse nomal, esischeso!

…und erscht recht spannnend am schluss. läck johnny isch das wiedermal es ränne gsi wo me nöd het dörfe verpasse. de massa het iidrücklich bewise, das er immerno de alti isch. de ufall vom letschtä jahr, wo de brawn vor im e schruube locker gha het und am massa e stahlfäderä mit 300 sache uf sini büchs flügt, het er offebar guet verarbeitet. das mannli het hüt en ragetestart uf de asphalt zauberet, vo 5 uf 2, huet ab! klar es isch wägem räge chli chaotisch gsi, das het aber au e gueti show geh. d’ferraris sind 20 rundine vor schluss, trotz dem dass de alonso wägeme dräher vo z’hinderscht hinde het müese uufhole, uf de plätz 3 und 4 mit 20 sekunde vorsprung uf de hamilton gsi. doch wil die beide rote uf de alte reife bliibe sind und de hamilton und de webber neue ufzoge händ, isch es nüd lang gange und di beide händ innerhalb vo 10 rundine de rückstand ufgholt. d’ferraris sind hinderem starke renault (wer hätti das dänkt) um einiges langsamer gsi als de mclaren und de red bull. 2-3 rundine vor schluss passierts, de hamilton versuecht de alonso z’überhole und de webber gseht sini grossi chance und kracht in hamilton ine, päff! it’s over boooooy! de vettel het wiedermal de defekttüfel a bord gha und isch mitemene brämsdefekt in füerig liegend uusgfalle. ferrari am schluss uf 3 und 4, i dr wm tabelle aber immerno uf 1 + 2, was het mal es gschiids mannli gseit, to finish first you have to finish first, ja mann, esischeso….!

heieieiei, de recorder het tatsächlich ufgno, so geil. ferrari het en spitze start i di neui saison herägleit, leider het de alonso vor em massa gwunne, aber d’hauptsach isch, dass de wo z’oberscht staht als torero unvorteilhaft agleit isch, ich gseh halt gärn rot, esischeso!

au das gits hützutags, es chunnt tatsächlich au vor, das ich, obwohl, ich gibes zue, widerwillig, uf es formel 1 ränne „verzichte“. wenn de hd-recorder dihei sin zweck erfüllt und damit d’grundlag leit, dass er nöd flüüge lernt, denn isch es nur halb so schlimm, semi live isch immer no besser als gar nüt. aber bis det here mues ich zerscht no vo z’hinderscht hinde im glarnerland uf züri, und das mit em zug. es isch en eiertanz, es langet ei einzige, wo per zuefall i miner nächi sitzt und s’resultat kennt und z’gfühl het er müesi das de ganze wält verzellä und scho werdi zum taliban. scho im restaurant z’linthal bini jedi volli stund gschwind veruse gange, ganz eifach wil im lokal inne isch radio gloffe und zu jeder volle stund sind nachrichte cho. ich mues feschtstelle, dass es hützutags sehr eifach isch zu informatione z’cho, aber z’verhindere, das me informatione überchonnt wo me nöd wett isch unglich schwieriger. es isch etz halbi feufi, und ich ha no kei ahnig was gloffe isch. no 45 minute und ich bin dänn dihei. sofern ken tubel verbal inkontinent wird söttis schaffe. und wenn de hd-recorder recorded het isch super, und wenn nöd, werdemer gseh wie guet das teil im flüüge isch, esischeso!

…so started morn de erschti lauf vo de formel 1 weltmeistertschaft in bahrain. positiv dass 2 roti under de erschte 3 sind, aber es wär natürli scho schöner gsi, wenn es rössli zvorderscht wär, jänu. aber sehr freut mi, dass de massa vor em alonso started, das tuet dem manndli sicher guet nach dem horrorunfall vo letscht jahr in ungarn. für mich persönlich isch er en sympathieträger, de fönsi isch sicher en top fahrer, ke frag, aber wehe wenn das manndli wieder so zickig wie bi mclaren tuet. wenn de massa de fönsi regelmässig büglet, glaub ich wird de hitzigi spanier das nöd lang mit sich umeträge chöne. er het hüt nachem quali doch eher fruschtriert id röhre glueget, gschlage werde tuet weh, und au das isch eso, esischeso!

ich luege grad s’dritte formel 1 training in bahrain, live. läck gahts mir guet! weniger guet gahts em neue virgin team, die händ nöd nur e schrube locker gha, sondern grad no es rad verlore, unschön!! de massa isch leider dütlich hinderem alonso bliibe, aber etz nur nöd de muet verlüre. mercedes macht e sehr e starke iidruck, de schumi isch det vom rosberg gschlage worde. etz warti gschpannt uf s’erschte qualifying vo dere saison, mann, esischeso!

…und es isch öppe ziit worde. a dem wucheänd gaht endlich di neui formel 1 saison los. ich han scho langsam entzugserschiinige, hani doch letscht nacht tatsächlich vom fönsi träumt. ich bin da echli hin und her grisse. für mich staht de massa höch im kurs und ihm würi de titel sehr gönne. aber irgendwie staht er im moment, no bevor d’saison agfange hät, scho im schatte vom fönsi. ich wünsche mir, dass sich die zwei verträged und dass es nöd eso usechunnt wie vor 3 jahr, wo de fönsi bi mclaren gsi isch und er en riese krach mit em hamilton azettled het. guet, me isch gneigt z’sägä dass en spanier bi de italos wohl eher uf e ähnlich mentalität trifft als uf de insle, you know what i mean…und dänn hettemer da no de schumi. ich bliibe debi, ich werd mi nie dra gwöhne dass das manndli etz in silber ummelauft, punkt! mercedes als reins dütsches team, mclaren als reins britisches team, da chömed doch gedanke an klassiker dütschland gäge england uf. nach der letschte verkorkste ferrari saison und zwei jahr ohni fahrertitel isch es öppe wieder a dr ziit, dass z’rössli allne devogaloppiert, ich möcht nöd wieder 20 jahr warte, bis es wider so wiit isch. das jahr schiints sichs uuszahle, das me die letschti saison früehziitig abghaket hät, um sich ufs neue auto z’konzentriere. bliibt mir a dere stell nur no öppis z’säge, forza ferrari! und natürli, esischeso!

de shit isch duss! de schumi gseht de silberstreife am horizont und öb ichs will wahr ha oder nöd, ich gseh rot vor wuet! ferraristi uf de ganze wält werdet das nöd eifach so schlucke, de schumi wächslet zum erzrival mit em stern, ich glaubs eifach nöd! das er zruggchunnt isch super für d’formel 1, ke diskussion, und die „junge wilde“ händ etz wieder en härte, 41-jährige brocke uf de pischte vo sicher wider ganz vorne mitfahre wird. es isch mit spannig z’rächne, wie sich vettel, hamilton aber au die beide latinos im ferrari gäge de altmeischter schlönd. bizarr, i de letschte beide jahr wo de schumi no gfahre isch, het ihm de alonso beidi titel abgrunge, etz sitzt de alonso im ferrari und mues mit sim einstige gägnerteam wieder gäge d’schumi-brawn allianz akämpfe. de schumi wird sicher vorne mitfahre (achtung widerholig), aber ich dänke, in maranello heissts „und etz ersch recht!“, kei ahnig wie me das uf italienisch seit. es wird für de massa und de fönsi e bsunderi sach sii, gäg de 7-malig-wm azträtte, das wird e ganz e heissi sach nächscht jahr, esischeso!